Ang Tradisyon ng Hungaw sa Loctuga, Manika at Oyang Libacao, Aklan

Abstract

Sa mga baryo ng Loctuga, Manika at Oyang ng Libacao, Aklan, matatagpuan natin ang isang kakaibang tradisyon ng pagpapakasal. Hungaw a ng tawag nila sa tradisyong ito. Ang ginamit ng mananaliksik para sa pag-aaral na ito ay ang pagkuha ng mga impormasyon sa mga aklat at sa pamamagitan ng mga panayam sa Libacao, Aklan. Katulad sa mga tradisyon ng pagpapakasal sa iba't-ibang grupong etnikong matatagpuan sa Pilipinas, ang hungaw ay isang ipinagkasundong kasal sa pagitan ng pamilya ng lalaki at babae. Dahil sa isa nga itong kasunduan sa pagitan ng mga magulang ng lalaki at babae, isang napakahalagang papel ang ginagampanan dito ng pamilya na itinalakay ng mananaliksik sa pag-aaral na ito. Bukod sa pamilya, binigyang pansin din ang iba pang mahahalagang aspetong makikita natin sa tradisyon ng hungaw ng panga-gad o paninilbihan, imbahada o pamamanhikan, hungit o subo, walihan o ang pagbibigay ng payo at pagdadaos ng hungaw sa bahay ng pamilya ng babae. Sinuri ang mga ito kung bakit mahahalaga ang mga ito sa tradisyon ng hungaw. Nakapaloob din sa pag-aaral na ito ang pagsuri ng mga aspetong ito bilang salamin ng lipunan - pamilya, ekonomiya at pulitika 一 ng mga residente ng Libacao, Aklan.