Busina sa petrolyo: epekto ng oil deregulation law sa kita ng mga tsuper sa sektor ng transportasyon

Abstract

Ang R.A. 8479 o ang Downstream Oil Industry Deregulation Act of 1998 ay ang batas na naglalayong mailiberalisa ang sektor ng langis sa Pilipinas para maipakita ang pagkilala ng gobyerno sa pribadong sektor na payabungin ang ekonomiya ng bansa. Matapos itong maisabatas, unti-unting tumaas ang presyo ng mga produktong petrolyo habang patuloy naman ang pagliit ng kita ng mga tsuper. Dahil sa sitwasyong ito, ang layunin ng pag-aaral na ito ay malaman ang epekto ng batas sa kita ng mga tsuper sa sektor ng transportasyon. Sa pag-aaral na ito, isinagawa ang pakikipagpanayam sa iba't-ibang sektor na may kinalaman sa isyu ng deregulasyon: ang mga institusyon sa gobyerno gaya ng Kongreso at DOE at ang mga tsuper sa iba't-ibang transport group. Isinagawa din ang isang sarbey sa tatlumpung mga tsuper sa sektor ng transportasyon gaya ng jeep, FX at traysikel. Lumabas sa pag-aaral na ang R.A. 8479 ay isa sa mga dahilan kung bakit lumiit at patuloy na lumiliit ang kita ng mga tsuper dahil sa unti-unting pagtaas ng mga produktong petrolyo. Patuloy na lumiliit ang kita ng mga tsuper dahil ang malaking bahagi nito ay napupunta lamang sa pambili ng langis sa kanilang pamamsada. Dahil dito, marapat lamang na ibalik sa gobyerno ang tungkulin na regulahin ang sektor ng langis sa Pilipinas upang matulungang maibsan ang mga paghihirap ng mga tsuper sa kanilang kita.