Abstract:
Ang pag-aaral na ito ay sasagot sa katanungang:
“Maituturing ba na power culture ang organizational
culture ng Museo De La Salle?”.
Sa pagsagot sa katanungang ito ay kumalap ng mga
datos ukol sa Museo De La Salle na tumutugon sa mga
indikasyon ng power culture base sa depinisyon ni
Harrison. Ang pagkalap ng mga datos ay isinagawa sa
pamamagitan ng pagbisita sa silid-aklatan, pagiinterbyu
sa mga miyembro at pagtigil sa opisina ng
Museo De La Salle. Nagsagawa ng mga interbyu upang
makuha ang opinyon ng mga miyembro ng organisasyon.
Ang pagsusuri sa mga datos ay sa pamamagitan ng
balangkas ng konseptong nabuo batay sa depinisyon ng
Organizational culture ni Schein at indikasyon ng
power culture ayon kay Harisson.
Ayon sa mga datos na nakalap, nasuri at nabigyang
kahulugan, lumalabas na bagama’t umaayon ang
organizational culture ng Museo De La Salle sa ilang
katangian ng power culture, may ilang katangian naman
na hindi tumutugma. Ang pangunahing katangian ng Museo
na umaayon sa diwa ng power culture ay ang pagkakaroon
nito ng charismatic figure na siya ring pinagmumulan
ng mga desisyon para sa grupo. Gayunpaman, ang
pagkakailalim ng Museo De La Salle sa DLSU system ang
bumabalakid upang ituring na power culture ang
organizational culture nito.
Kung kaya ang’ aking konklusyon ay bagama’t
kakikitaan ng katangian ng power culture ang Museo De
La Salle, ito ay nababawasan ng diwa dahil sa
napapasailalim ito sa isa pang malaking organisasyon.
Kung kaya naglatag ng pagbabago sa makabanyagang
konsepto ng power culture sa pamamagitan ng
pagsasakonteksto nito sa pantayong pananaw. Ang
ebalwasyon ng pag-aaral ay batay sa ideya ni Habermas
sa kanluraning konsepto ng kapangyarihan base sa
dominasyon at opresyon. Sa pag-aaral ng organizational
culture ng Museo De La Salle, masasalamin ang konsepto
ng kKapangyarihan nguni’t sa ibang konteksto. Ang
kapangyarihan ng lider ng Museo De La Salle ay hindi
nakamit dahil sa pagdodomina sa kanyang nasasakupan
kungdi bunga ng kagandahang loob, respeto at
pakikipag-kapwa tao. Sa pamamagitan nito, hindi lamang
ang lider ang nabibigyan ng kapangyarihan kungdi
maging ang lahat ng mga miyembro ng organisasyon.
Madali para sa Museo De La Salle ang maabot ang
kanilang layunin bilang isang organisasyon sapagka’t
ang lahat ng mga miyembro ay nakikisa sa isang misyon
ng Museo De La Salle.
