Minahal, minamahal, at nagmamahal: ang imahen ng kababaihan sa querida films sa Pilipinas

Abstract

Ang pananaliksik na ito ay nakatuon sa pagtukoy sa imahen ng kababaihan na makikita sa querida films sa Pilipinas. Kaakibat ng pagtukoy sa imahen ng kababaihan sa querida films na pangunahing layunin ng pag-aaral ay isinama rin sa pananaliksik na ito ang pagtalakay ukol sa pag-usbong ng querida films sa bansa. Isinagawa ang pananaliksik sa pamamagitan ng pagtukoy sa representasyon ng asawa at querida na parehong kumakatawan sa kababaihan sa loob ng querida films. Ang pagsusuri ay isinagawa sa pamamagitan ng panonood ng labindalawang piling querida films mula sa taong 1975 hanggang 2012. Sinuri ang mga pelikula sa deskriptibong pamamaraan gamit ang teoryang Feminismo. Mula sa mga pagsusuring ginawa ay nakabuo ng anim na representasyon ng asawa at/o querida sa querida films. Mula sa mga representasyong ito ay nabuo ang apat na imahen ng kababaihan na makikita sa querida films sa Pilipinas na sumasailalim sa usaping pinansiyal, biyolohikal, emosyonal, at pisikal. Sa pamamagitan ng mga imaheng ito makikita na bumabalangkas pa rin ang imahen ng kababaihan sa querida films sa sinasabi ni Lilia Santiago (1997) na ang lipunan ng kababaihan ay kasalukuyan pa ring dumaranas ng mga epekto ng sistemang patriarkal.